2 bahay tinupok ng apoy sa Isabela

CAUAYAN CITY– Posibleng electrical short circuit ang itinuturong sanhi sa pagkasunog kagabi ng dalawang bahay sa Brgy. Tres, San Mateo, Isabela.

Ang ang bahay na pinagmulan ng sunog ay pag-aari ng magkapatid na sina Harry at Jeffrey Sebastian habang ang nadamay na bahay ay pag-aari ni Fernando Serrano.

Sa panayam ng Bombo Radyo Cauayan, sinabi ni SFO2 Francisco Mateo, Fire Marshal ng BFP-San Mateo, na narekober nila ang fuse box sa bahay ng magkapatid na Sebastian at nakita na may bukol-bukol ang linya ng kuryente.

Aniya, nangangahulugan na nagkaroon ng electrical short circuit sa linya ng kuryente.

Magkagayunpaman, inihayag din ng fire marshal na kailangan pa rin nilang ivalidate ito upang tuluyang malaman ang dahilan ng sunog.