CAUAYAN CITY – Bibigyan ng military honors ng 5th Infantry Division Philippine Army (5th ID, PA) ang dalawang sundalo na namatay sa naganap na pagsabog sa Jolo Sulu.
Namatay habang nagseserbisyo sa bayan sina Staff Sgt. Louie Cuarteros na residente ng Tuao, Cagayan at Staff Sgt. Manuelito Oria, residente ng Santiago City at kapwa kasapi ng 21st Infantry Battalion ng 11th Infantry Division Philippine Army.
Namatay din ang isang miyembro ng PNP Special Action Force na si PSMS Joe Michael Langbis na tubong Tuba, Benguet.
Sa naging panayam ng Bombo Radyo Cauayan kay Major Noriel Tayaban, hepe ng Division Public Affairs Office (DPAO) ng 5th ID, PA ay nagpaabot siya ng pakikidalamhati sa pamilya ng nasawing anim na sundalong miyembro ng 21st IB, PA.
Sa pagdating ng mga labi nina Staff Sgt Louie Cuarteros at at Staff Sgt Oria ay gagawaran sila ng military honors ng 5th ID bilang pagpupugay sa kanilang kabayanihan sa bansa.
Ayon kay Major Tayaban, iuuwi ang bangkay ni Staff Sgt Manuelito Oria sa Lubuagan, Kalinga kung saan siya nakapag-asawa.
Kasalukuyan na ang pakikipag-ugnayan ng 5th ID sa kapamilya ng mga sundalong namatay sa naganap na pagsabog.
Nalulungkot man ang hanay ng militar sa pagkalagas na naman ng ilan nilang kasama dahil sa paghahasik ng karahasan ng mga terorista ay nananatiling mataas ang morale ng mga sundalo na ipagpatuloy ang pagtatanggol sa sa bansa.
