Tinulungan ng Singapore ang 24 Pilipino na makaalis mula sa Gulf region, sa gita ng nagpapatuloy na tensiyon sa Gitnang Silangan, ayon sa Department of Foreign Affairs (DFA) nitong Biyernes.
Pinayagan ang mga Pilipino na sumakay sa Republic of Singapore Air Force (RSAF) A330 Multi-Role Transport Tanker (MRTT), na ipinadala ng Singapore sa Middle East upang ilikas ang 81 Singaporeans mula sa Jeddah, Saudi Arabia.
“The DFA conveys its sincere appreciation to the Government of Singapore for this benevolent act, which exemplifies the ASEAN spirit of solidarity,” ani DFA sa pahayag nito.
Kasama ang Pilipinas at Singapore sa 11 na bansang kasapi ng Association of Southeast Asian Nations (ASEAN).
Ayon sa mga opisyal ng Pilipinas, nahirapan silang makakuha ng outbound flights mula Jeddah dahil sa limitadong biyahe ng mga eroplano dulot ng nagpapatuloy na kaguluhan sa rehiyon sanhi ng labanan ng pinagsanib na puwersa ng US at Israel kontra Iran.
Bukod sa mga Pilipino, kasama rin sa inilikas ng Singapore gamit ang parehong eroplano ang mga mamamayan ng Australia, Brunei, Indonesia, Sri Lanka, at Vietnam, ayon kay Singapore Ambassador Constance See.
“This is in the spirit of solidarity, just as how other countries have assisted Singaporeans in returning home in past crises,” dagdag ni See.
Umalis ang eroplano sa King Abdulaziz International Airport sa Jeddah dakong 4:00 p.m. noong March 12 at dumating sa Singapore dakong 6:00 a.m. noong March 13.
Inalalayan ng Philippine Embassy sa Singapore ang mga Pilipino para sa kanilang biyahe pauwi ng Pilipinas, ayon sa DFA.
“This was very much a partnership. We worked in close coordination with the Department of Foreign Affairs and the Philippine Consulate General in Jeddah, to facilitate the Filipinos who joined the flight,” paliwanag ni See.
“The Philippine government, through the DFA and its missions, has been mounting complex repatriation efforts to bring Filipinos home safely. Our flight complements those efforts,” dagdag niya.
