CAUAYAN CITY – Nasugatan ang tatlumpu’t apat na tao matapos mawalan ng preno at bumangga sa puno ang isang pampasaherong jeep sa bayan ng Bontoc.
Sa naging panayam ng Bombo Radyo Cauayan kay PMAJ. RYAN WAKAT, hepe ng Bontoc Police Station, sinabi niya galing sa barangay Maligcong ang naturang pampasaherong jeep at may sakay na tatlumpu’t apat.
Aniya, nawalan ng break habang pababa sa daan na bahagi ng barangay Caluttit ang jeep kaya naisipan ng driver na ibangga ito sa kahoy.
Nasugatan ang tatlumpu’t apat na sakay nito na dinala sa pagamutan at ngayon ay nakalabas na ang dalawampu’t tatlo habang ang labing isa ay patuloy na inoobserbahan sa ospital.
Ayon kay PMAJ. WAKAT, matarik ang daan kung saan nangyari ang aksidente bukod pa sa pakurbada ito.
Lampas naman aniya sa kayang isakay ng jeep ang sakay nito.
Aniya, nasa maayos pa naman ang kondisyon ng jeepney at nagkaproblema lang sa break nito.
Sa ngayon ay patuloy pa rin ang kanilang imbestigasyon sa pangyayari.
Paalala nila sa mga motorista na i-check ng mabuti ang sasakyan bago bumiyahe para makaiwas sa mga kahalintulad na aksidente.
