Arestado ang apat na lalaki sa isinagawang anti-illegal logging operation ng Police Regional Office 2 sa Barangay Dy Abra, Tumauini, Isabela.
Sa panayam ng Bombo Radyo Cauayan kay Pmaj. Melchor Aggabao Jr. Ang hepe ng tumauini Police Station, sinabi niya na ang operasyon ay bahagi ng pinaigting na kampanya ng PNP Isabela laban sa iligal na pagpuputol ng punongkahoy at pagkakaingin sa lalawigan.
Batay sa datos ng PNP kinilala ng mga awtoridad ang mga suspek na sina alyas “Mon,” 51; alyas “Fil,” 35; alyas “Ding,” 35- anyos at alyas “Ron,” 25-anyos pawang mga magsasaka at residente ng nasabing barangay.
Pinangunahan ng Tumauini Police Station ang operasyon katuwang ang Provincial Intelligence Unit–Isabela PPO, Provincial Intelligence and Detective Management Unit–Isabela PPO, at ang City Environment and Natural Resources Office (CENRO) Cabagan.
Ayon sa pulisya bago ang operasyon ay nakatanggap sila ng impormasyon na may nagaganap na iligal na pagbibiyahe ng mga pinutol na punong kahoy.
Pagdating sa lugar ay naaktuhan ang mga suspek nahuli ang mga suspek habang dala ang mga pinutol na red lauan na itinawid pa sa ilog at ikinarga sa isang three-wheeled motorcycle nang walang kaukulang permit mula sa kinauukulang ahensya.
Nakumpiska mula sa mga suspek ang apat na piraso ng soft wood na may iba’t ibang laki na may kabuuang volume na 258 board feet at tinatayang halagang ₱12,900, gayundin ang ginamit na three-wheeled motorcycle. Ang mga ebidensya ay maayos na minarkahan at inimbentaryo sa lugar ng insidente sa pakikipagtulungan ng CENRO Cabagan.
Dinala ang mga suspek at ang mga nakumpiskang gamit sa Tumauini Police Station para sa dokumentasyon at wastong disposisyon. Inihahanda na rin ang kasong paglabag sa Presidential Decree No. 705 o Revised Forestry Code of the Philippines laban sa kanila.
Depensa ng mga nadakip ang mga kahoy ay gagamitin sana sa pagtatayo ng bahay kaya muling nag paalala ang PNP na anumang kahoy na puputulin ay dapat may permit o pahintulot mula sa DENR at ang chainsaw na gagamitin ay dapat ding rehistrado sa naturang ahensya.
Sa katunayan hindi na ito ang unang pagkakataong nakaaresto sila ng iligal na transportasyon ng iligal na pinutol sa kahoy dahil sa mga nagdaang buwan o taon ay nakadakip na rin sila ng mga iligal na nagputol ng kahoy kabilang ang G-melina na walang cutting at transport permit.
