CAUAYAN CITY – Patuloy ang pagtulong ng Tactical Operations Group (TOG2) ng Philippine Air Force (PAF) sa Department of Health (DOH) sa pagdadala ng mga bakuna sa mga coastal towns sa ikalawang rehiyon.
Sa naging panayam ng Bombo Radyo Cauayan, inihayag ni Lt Col Sadiri Tabutol, Commander ng TOG2, PAF na bilang suporta nila ay nagdala sila kahapon ng mga COVID-19 vaccines sa Calayan Island, Cagayan gamit ang kanilang chopper.
Ang aabot sa mahigit 1,335 doses ng bakuna ay malugod na tinanggap ng mga opisyal ng pamahalaang lokal ng Calayan Island.
Noong January 15, 2022 ay nagdala rin sila ng mga bakuna COVID-19 sa Fuga Island, Aparri, Cagayan gamit ang Sokol helicopter.
Maayos nilang nadala ang mga cannister ng tatlong vials ng Sinovac, 216 vials ng Pfizer, 1,000 vials ng Jansen at tatlong box ng mga supply ng gamot ng 7 DOH personnel at LGU lulan ng chopper.
Matatandaang noong Marso 2021 ay nagdala ang TOG2 ng unang batch ng mga bakuna sa Basco, Batanes at dumaan sila sa Calayan Island gamit ang S70i Blackhawk helicopter.
Muli silang nagdala ng mga bakuna noong Hunyo 2021 sa Calayan Island at Batanes.
Nagdala sila ng mga karagdagang bakuna sa Calayan island noong October 28 at November 29, 2021 sa Calayan Island.
Ayon kay Lt. Col. Tabutol, ang Philippine Air Force at iba’t ibang ahensiya ng pamahalaan ay nagtutulungan sa pagpapatupad ng mga hakbang para labanan ang pandemya.
