Boom truck, nasabit sa kawad ng kuryente, 2 kritikal

CAUAYAN CITY- Nasa malubhang kalagayan ang dalawang lalaki makaraang makuryente sa San Manuel, Naguillian, Isabela.

Ang mga biktima ay kinabibilangan ng isang 16 anyos na helper na residente ng Angadanan, Isabela at isang Richard Laisa, 20 anyos, operator ng boom truck at residente ng Barangay Sta. Luciana, Cauayan City.

Ang mga biktima ay nagkakarga ng mga kagamitang ginamit sa road widening project na kailangang ilipat sa ibang lugar nang aksidenteng masagi ng boom truck ang high voltage main line ng Isabela Electric Cooperative 2.

Ang dalawang biktima ay nagtamo ng serious injuries at ginagamot ngayon sa Gov. Faustino N. Dy Memorial Hospital sa Ilagan City.