CAUAYAN CITY – Nagluluksa ngayon ang mga kapamilya at mga kabarangay sa Busilelao, Echague, Isabela sa pagbaril at pagpatay kay Barangay Kapitan Rogelio Sacro habang binabagtas ang daan sa Dammang East, Echague, Isabela.
Lumabas sa imbestigasyon ng Echague Police Station na dakong 12:15 kaninang tanghali nang tambangan at pagbabarilin ng mga suspek si Barangay Kapitan Sacro, 62 anyos.
Naganap ang pananambang kay Kapitan Sacro habang binabagtas ng minamanehong tricycle ang daan sa Dammang East, Echague, Isabela.
Nagtamo ng mga tama ng bala ng baril ang iba’t ibang bahagi ng katawan ni Kapitan Sacro.
Dinala si Kapitan Sacro sa ospital kung saan siya binawian ng buhay.
Nagsagawa ng hot pursuit operation ang mga kasapi ng Echague Police Station sa mga tumakas na salarin.
