CAUAYAN CITY – Inaresto ang isang security guard na nagpanggap na pulis at nangikil sa may-ari ng computer shop sa isinagawang entrapment operation sa Barangay District 4.
Sa naging panayam ng Bombo Radyo Cauayan, inihayag ni Police Major Rolando Gatan, hepe ng Tumauini Police Station na ang pinaghihinalaan ay si Joemar Calara , tatlumput isang taong gulang, may-asawa, Security Guard at residente Binguang, San Pablo, Isabela
Ang magkasanib na puwersa ng Tumauini Police Station at Prov’l. Iintelligence Unit ng Isabela Police Provincial Office ay nagsagawa ng entrapment operation laban sa pinaghihinalaan na naaktuhang tinatanggap ang pre-marked money mula sa nagrereklamo na si Joash Astudillo Salvador,may-ari ng computer shop.
Nasamsam din sa pinaghihinalaan ang green belt bag kung saan inilagay ang Pre-marked money na isang genuine 500.00 peso bill, apat na piraso ng 1,000.00 boodle money, isang 500.00 pesos boodle money,isang unit ng Homemade pistol shotgun, isang hand grenade,tatlong bala ng 12 gauge shotgun at transparent plastic sachet na naglalaman ng pinatuyong dahon ng marijuana
Nauna rito ay nagtungo ang pinaghihinalaan sa computer shop ni Salvador at nagpanggap na si Police officer Jay Tamang na nakatalaga sa Regional Intelligence Division PRO 2 at hiningan ng limang libong piso ang biktima kapalit umano ng patuloy na operasyon ng kanyang internet shop.
Nagduda anya ang may-ari ng computer shop sa pinaghihinalaan kayat nagsumbong sa mga pulis na naging dahilan ng kanyang pagkakaaresto.
