5TH ID PA pinalakas pa ang pwersa kasabay ng kanilang pagbuo ng bagong batallion

CAUAYAN CITY – Pinapalakas  ng  5th Infantry Division Philippine Army ang kanilang pwersa para makamit ang kapayapaan at katahimikan sa kanilang nasasakupan kasabay ng kanilang pagbuo ng bagong battalion.

Sa naging panayam ng Bombo Radyo Cauayan, inihayag ni Captain Rigor Pamittan, DPAO Chief ng 5^th ID na sinimulan nang buuin ang 102^nd Infantry Battalion na makakasama ng ibang units ng 5^th Infantry Division Phil. Army sa kampanya kontra insurhensiya sa kanilang nasasakupan pangunahin na  sa Lambak ng Cagayan at Cordillera Administrative Region.

Inihayag ni Captain Pamittan na si Lt. Col. Lemuel Baduya ang itinalagang magiging Acting Battalion Commander ng 102^nd  IB.

Aniya, nasa mahigit 450 personnel ang kailangan para tuluyan nang masimulan ang kanilang organizational training.

Sinabi pa ni Captain Pamittan na pagkatapos ng isasagawang assessment at training ay dito pa lamang malalaman ang kanilang magiging Area of Operation.

Umaasa ang pamunuan ng 5^th ID na sa pagkakaroon nila ng karagdagang puwersa ay mas lalong malilimitahan ang paggalaw ng mga rebeldeng NPA sa kanilang nasasakupan.

Puntirya  nilang  bago matapos ang taong 2022 ay mabuwag na ang puwersa ng East Front at West Front ng Komiteng Probinsiya ng Cagayan  sa ilalim ng Komiteng Rehiyong Cagayan Valley.

Pinagtutuunan din nila ng pansin ang mga natitirang kasapi ng Central Front ng Komiteng Probinsiya ng Isabela.