Iniimbestigahan ngayon ng Commission on Elections (Comelec) ang campaign contributions ng tatlong senador at isang lokal na kandidato sa Bulacan noong 2022, upang matukoy kung tumanggap sila ng donasyon mula sa mga kontratistang may proyekto sa gobyerno.
Ayon kay Comelec Chairman George Garcia, motu proprio ang imbestigasyon at saklaw nito ang lahat ng kandidato hindi lang ang mga nababanggit sa balita. Inaasahang lalabas ang resulta sa loob ng dalawa hanggang tatlong linggo.
Kaugnay ito ng mga alegasyon ng korapsyon sa flood control projects na umabot sa P545 bilyon.
Isa sa mga contractor na iniimbestigahan ay ang Centerways Construction, na sinasabing nagbigay ng P30 milyon kay Senate President Francis Escudero noong 2022.
Bagamat kaibigan ni Escudero ang presidente ng Centerways, itinanggi niyang ginamit ang posisyon bilang gobernador ng Sorsogon para makakuha ng kontrata ang kumpanya.
Aniya, ipinagbabawal ng Section 95(c) ng Omnibus Election Code ang donasyon mula sa mga kontratista ng gobyerno, personal man o sa ngalan ng kumpanya.
May limang taong prescriptive period ang Comelec para habulin ang mga lumabag.
Binanggit ni Garcia ang legal na butas sa batas tulad ng kakulangan sa detalye ng donor occupation sa SOCE, na maaaring magtago ng koneksyon sa gobyerno.
Samantala, bumuo ng tri-committee ang Kamara para silipin ang flood control projects ng DPWH at iba pang ahensya.
Ilang senador, kabilang sina Jinggoy Estrada at Sherwin Gatchalian, galit sa umano’y “raket” ng ghost projects at phase-by-phase funding na may kickback.
Tinuligsa ng ilang mambabatas ang pahayag ni Mayor Benjamin Magalong na “moro-moro” ang imbestigasyon, at nanawagan ng respeto sa Moro communities.
