Nakatakdang magsagawa ng plate distribution ang Land Transportation Office (LTO) Cauayan City sa Barangay Del Pilar, Cabatuan, Isabela sa ika-20 ng Setyembre 2025.
Sa panayam ng Bombo Radyo Cauayan kay Ginoong Deo Salud, hepe ng LTO Cauayan City, sinabi niya na magsisimula ang distribusyon mula alas-8 ng umaga hanggang alas-5 ng hapon.
Dahil dito, nanawagan siya sa mga motorista na hindi pa nakukuha ang plate number ng kanilang mga sasakyan o motorsiklo na narehistro noong 2017 pababa na dumalo sa distribusyon upang kunin ang kanilang plaka.
Pinaalalahanan din niya ang mga motorista na magdala ng OR/CR ng kanilang sasakyan o motorsiklo at valid ID upang makuha ang plaka, at nilinaw niya na ito ay libreng ibinibigay ng tanggapan.
Ipinaliwanag pa niya na kahit ang mga motorsiklo ay hindi pa rehistrado ngayong taon ay maaari pa ring kunin ang plaka basta may dalang OR/CR.
Ayon kay Ginoong Salud, umabot na sa 1499 na plaka ang kanilang naipamahagi habang nasa 900 na plaka pa ang nasa kanilang pangangalaga na puntirya nilang maipamahagi hanggang sa Oktubre.
