Naglandfall na ang Bagyong TINO sa bahagi ng Silago, Southern Leyte ngayong madaling araw. Ayon sa pinakahuling ulat ng PAGASA, ang sentro ng mata ng bagyo ay kasalukuyang nasa karagatan ng Mahaplag, Leyte, batay sa datos mula sa Guiuan Doppler Weather Radar.
Taglay ni TINO ang lakas ng hangin na 150 kilometro kada oras malapit sa gitna at pagbugso na umaabot sa 205 kilometro kada oras. Patuloy itong kumikilos pakanluran sa bilis na 30 kilometro kada oras.
Nasa ilalim ng Tropical Cyclone Wind Signal (TCWS) No. 4 ang mga sumusunod na lugar:
Bahagi ng Eastern Samar (Guiuan, Mercedes)
Kanlurang at timog bahagi ng Leyte kabilang ang Mahaplag, Abuyog, Baybay City, Hilongos, Hindang, at Bato
Southern Leyte
Hilagang bahagi ng Cebu kabilang ang Cebu City, Lapu-Lapu, Mandaue, at Camotes Islands
Hilagang bahagi ng Bohol, Negros Oriental, at Negros Occidental, gayundin ang Guimaras, Iloilo, at timog bahagi ng Antique
Sa Mindanao, apektado ang Dinagat Islands, Siargao, at Bucas Grande Islands.
Ang mga lugar na nasa ilalim ng Signal No. 4 ay makakaranas ng matitinding hangin at malalakas na pag-ulan na maaaring magdulot ng pagbaha at storm surge.
Nakataas naman ang Signal No. 3 sa ilang bahagi ng Samar, Leyte, Cebu, Bohol, Negros, Iloilo, Capiz, at Antique, gayundin sa Surigao del Norte. Inaasahan sa mga lugar na ito ang malalakas na hangin at pag-ulan sa susunod na 18 oras.
Ang Signal No. 2 ay umiiral sa mga bahagi ng Mindoro, Romblon, Masbate, Palawan, at iba pang bahagi ng Visayas at Mindanao. Samantala, ang Signal No. 1 ay nakataas sa Albay, Sorsogon, Quezon, Marinduque, Northern Samar, at ilang bahagi ng Mindanao, kabilang ang Misamis Oriental at Zamboanga del Norte.
Ayon sa PAGASA, kasalukuyang dumaraan si TINO sa mga lugar ng Homonhon Island at Dinagat Islands matapos tumama sa Silago. Inaasahan itong tatawid sa Visayas at hilagang bahagi ng Palawan hanggang Nobyembre 5 ng umaga, bago tuluyang lumabas ng Philippine Area of Responsibility (PAR) sa Nobyembre 6 ng umaga.
Bagaman posibleng bahagyang lumakas pa bago lumabas ng PAR, mananatili pa rin ito bilang isang typhoon category habang tumatawid sa bansa.
Pinapayuhan ng PAGASA ang lahat ng residente, lalo na sa mga lugar na nasa ilalim ng Signal Nos. 3 at 4, na maging mapagmatyag at alerto laban sa malalakas na hangin, pagbaha, storm surge, at posibleng pagguho ng lupa.
Patuloy na makinig sa mga opisyal na abiso at update mula sa PAGASA at sundin ang mga tagubilin ng lokal na pamahalaan upang matiyak ang kaligtasan ng lahat.
