Ilang resource persons na ipinatawag ng Senate Blue Ribbon Committee ay “ripe for contempt” matapos paulit-ulit na hindi dumalo sa mga pagdinig kaugnay ng anomalya sa mga proyekto ng flood control, ayon kay Sen. Panfilo Lacson, chairman ng komite.
Ayon kay Lacson, halos lahat ng binigyan ng show-cause orders dahil sa pagliban noong nakaraang linggo ay maaaring ma-cite in contempt at ma-detain, dahil hindi kapani-paniwala ang mga dahilan ng kanilang pagliban.
Kabilang sa mga ito ang puganteng dating kongresista Zaldy Co, ang umano’y mga bagman niyang sina Mark Ticsay at Paul Estrada, saksi Orly Guteza, at Commissioner Mario Lipana ng Commission on Audit.
Binigyang-diin din ni Lacson na pantay-pantay na ipatutupad ang mga patakaran ng komite, kahit pa may ilan na nagsasabing sila’y naka-confine sa ospital.
Dagdag pa ni Lacson, malapit nang matapos ang partial committee report sa flood control investigation.
Samantala, sinabi ng Independent Commission for Infrastructure (ICI) na wala pa silang natatanggap na sulat mula sa Malacañang hinggil sa kanilang pagbuwag.
Noong Enero 16, iniulat ng fact-finding body na isinasalaysay na nila ang kanilang mga “accomplishments” sa isang ulat na isusumite sa Office of the President, habang nakabitin pa ang kapalaran ng komisyon.
Nauna nang sinabi ni Sen. Imee Marcos na may impormasyon siyang natanggap mula sa hindi pinangalanang source na mawawala na ang ICI sa Pebrero 1. Ngunit pinabulaanan ito ng Palasyo, na nagsabing tuloy-tuloy pa rin ang trabaho ng komisyon.
Hindi pa rin nagtatalaga si President Marcos ng kapalit para sa mga nagbitiw na commissioners na sina Rogelio Singson at Rossana Fajardo noong Disyembre. Dahil tanging si Chairman Andres Reyes Jr. na lang ang natitira, teknikal na hindi na magampanan ng ICI ang kanilang tungkulin.
