Pumanaw na nitong Huwebes si Estrella “Inday” Barretto, ang itinuturing na matriarch ng isa sa mga pinakakilalang pamilya sa showbiz ng Pilipinas at ina ng mga aktres na sina Claudine, Marjorie at Gretchen Barretto.
Kinumpirma ang kanyang pagpanaw ng bunsong anak na si Claudine Barretto sa pamamagitan ng isang post sa Instagram. Ibinahagi ni Claudine ang ilang video kung saan makikitang kasama niya ang kanyang ina na nakahiga sa hospital bed.
Sa caption ng kanyang post, isinulat ni Claudine, “Oh Mom 💔 January 29, 2026.” Makalipas ang ilang oras, sinundan pa niya ito ng isa pang post na nagsabing, “Mommy, we’re gonna be okay 👍 Promise!”
Sa ngayon, wala pang inilalabas na karagdagang detalye kaugnay sa sanhi ng pagkamatay ni Estrella Barretto, gayundin sa mga funeral arrangement.
Si Estrella Barretto ay asawa ng yumaong si Miguel Alvir Barretto na pumanaw noong 2019. Mayroon silang pitong anak sina Miguel Antonio “Mito” Barretto, ang panganay na pumanaw noong Setyembre 2025; Michelle Barretto; Joaquin “JJ” Barretto, ama ng aktres na si Nicole Barretto; Geraldine “Gia” Barretto-Hong na nakabase sa Estados Unidos; at ang tatlong kilalang magkakapatid sa showbiz na sina Gretchen, Marjorie at Claudine Barretto.
Madalas mabanggit si Estrella Barretto sa mga kwento tungkol sa makapangyarihan at minsang kontrobersyal na Barretto clan, na sa loob ng ilang dekada ay nanatiling bahagi ng kulturang popular ng Pilipinas.
