Nagpalit ng liderato ang defense team ni dating Pangulong Rodrigo Duterte para sa nakatakdang paglilitis ng kanyang kasong crimes against humanity sa International Criminal Court (ICC). Itinalaga bilang bagong lead counsel ang batikang British barrister na si Peter Haynes.
Pinalitan ni Haynes si Nicholas Kaufman, na ang isang taong kontrata ay natapos noong Marso 31, 2026. Batay sa mga dokumentong isinapubliko nitong Mayo 12, personal na binitawan ni Duterte si Kaufman sa kanyang tungkulin noong bumisita ang defense team sa ICC detention center sa The Hague noong Mayo 7.
Si Haynes ay isang “King’s Counsel” na may mahigit 30 taong karanasan at kilala sa pagkapanalo sa mga malalaking kaso sa ICC.
Siya ang lead counsel na nakakuha ng bihirang full acquittal para kay Jean-Pierre Bemba, ang dating bise presidente ng Congo, noong 2018. Binaliktad ng Appeals Chamber ang naunang hatol na pagkakasala ni Bemba sa mga war crimes.
Nagsilbi siyang presidente ng ICC Bar Association ng dalawang termino simula noong 2019.
Noong 2024, siya rin ang itinalaga ng ICC para katawanin ang commander ng Lord’s Resistance Army na si Joseph Kony.
Ayon kay Kaufman, kumbinsido siyang magiging maayos ang pagpapatuloy ng depensa ni Duterte sa ilalim ni Haynes dahil sa lawak ng karanasan nito sa naturang pandaigdigang hukuman.
Ang pagbalasa sa legal team ni Duterte ay naganap ilang linggo matapos kumpirmahin ng Pre-Trial Chamber I noong Abril 23 ang tatlong bilang ng crimes against humanity laban sa dating pangulo. Ayon sa mga hukom, mayroong “substantial grounds” na maniwala na may mahalagang papel si Duterte sa pagpatay sa 76 katao at tangkang pagpatay sa dalawa pa sa gitna ng kanyang “war on drugs.”
Nakatakdang dumalo si Haynes sa isang status conference sa Mayo 27, kung saan inaasahang tatalakayin ng Trial Chamber III ang petsa para sa pormal na pagsisimula ng paglilitis.
