Sinalakay ng mga awtoridad ang umano’y iligal na operasyon ng online sabong o E-Sabong sa bayan ng Maddela, Quirino, na nagresulta sa pagkakaaresto ng limang indibidwal at pagkakasamsam ng iba’t ibang kagamitang ginagamit sa online betting.
Isinagawa ang anti-illegal gambling operation sa isang cockpit arena sa Barangay Villa Hermosa Norte, Maddela, bilang bahagi ng pinaigting na kampanya laban sa ilegal na sugal.
Ayon sa pulisya, ikinasa ang operasyon matapos makatanggap ng impormasyon hinggil sa umano’y iligal na online betting activities sa naturang lugar.
Bago isinagawa ang pagsalakay, nagsagawa muna ng validation ang mga operatiba upang tiyakin ang katumpakan ng natanggap na ulat.
Sa operasyon, nakumpiska ang online betting machine, CCTV system, Starlink internet equipment, at iba pang electronic devices na pinaniniwalaang ginagamit sa pagpapatakbo ng online betting operation.
Nahaharap ang limang suspek, na pawang residente ng Quirino, sa kasong paglabag sa Presidential Decree No. 1602 o Illegal Gambling.
Ayon sa pulisya, nagpapatuloy ang kanilang kampanya laban sa lahat ng uri ng ilegal na sugal upang mapanatili ang kapayapaan at kaayusan sa komunidad.
