CAUAYAN CITY – Pormal nang nanungkulan bilang bagong hepe ng Cauayan City Police Station si PLt Col Sherwin Cuntapay matapos na isagawa ang turnover ceremony kahapon na pinangunahan ng mayor ng Cauayan City at Provincial Director ng Isabela Police Provincial Office (IPPO).
Pinalitan ni PLTCOL. Cuntapay, dating commander ng 2nd Isabela Provincial Mobile Force Company si PLt Col Gerald Gamboa na mahigit isang taong naging hepe ng pulisya sa Lunsod ng cauayan.
Sa naging pagpapahayag ni PLt Col Cuntapay, tiniyak niya na ipagpapatuloy niya ang mga nasimulang proyekto ng Cauayan City Police Station sa ilalim ni PLt Col Gamboa.
Dagdag niya na ipagpapatuloy din ang battlecry ng Regional Director ng Police Regional Office (PRO2) na si Brig. Gen. Crizaldo Nieves na tatlong N – pulis na nakikita, pulis na nararamdaman at pulis na nagugustuhan ng taumbayan.
Inisa-isa namang pinasalamatan ni PLTCOL. Gamboa ang mga naging kasama sa trabaho na umalalay sa kanya para makamit ang mga pagkilala pangunahin na ang pagiging Best City Police Station sa Isabela.
Pinasalamatan din niya ang pamahalaang lunsod ng Cauayan sa pangunguna ni Mayor Bernard Dy dahil sa suporta at pagtitiwala na ibinigay sa kanilang hanay.
Hinamon naman ni PCol. James Cipiriano, Provincial Director ng IPPO ang bagong hepe ng Cauayan City Police Station na pag-ibayuhin ang pagtatrabaho upang maiuwi pa rin ng Lunsod ng Cauayan ang pagiging Best City Police Station sa buong Lambak ng Cagayan.
Aniya, malaki ang naging kontribusyon ng naturang himpilan ng pulisya sa mga accomplishment ng IPPO dahilan para makamit ang unang pwesto sa Police Provincial Office sa rehiyon.
Pinasalamatan naman ni PCol. Cipriano si PLt Col Gamboa sa kanyang naging serbisyo para sa mga mamamayan ng lunsod.
Sinabi naman ni Mayor Bernard Dy na sa mahigit isang taong pagiging hepe ni PLt Col Gamboa sa lunsod na tinawag niyang Big man ay p hindi matatawaran.
Hanga siya sa ipinakitang serbisyo ng dating hepe sa kanyang mga nasasakupan.
Binati ni Mayor Dy ang bagong hepe ng Cauayan City Police Station na si PLTCOL. Sherwin Cuntapay.
