Hindi naaprubahan ng Kongreso ang panukalang dagdag na sahod para sa mga minimum wage earners sa private sector matapos mabigo ang bicameral conference committee na pag-isahin ang magkaibang bersyon ng Senado at Kamara sa huling araw ng sesyon ng 19th Congress.
Sa kabila ng naunang pagsang-ayon ng Senado sa ₱100 Daily Minimum Wage Hike Bill, hindi ito in-adopt ng Mababang Kapulungan, na patuloy namang iginiit ang ₱200 wage hike isang halagang itinuturing na hindi kakayanin ng maliliit na negosyo.
Ayon kay Senator Migz Zubiri, may-akda ng Wage Hike Bill, ginawa ng Senado ang lahat upang ipaglaban ang karapatan ng mga manggagawa. Gayunman, kung tatanggapin ng Senado ang panukala ng Kamara, tiyak umano itong mave-veto ng pangulo.
Samantala, sinabi ni Senate President Chiz Escudero na walang sapat na pag-aaral ang Kamara sa ₱200 wage hike at ipinasa lamang ito sa huling linggo ng kanilang sesyon.
Binanggit din niya na hindi dapat ipasa ang sisi sa Senado dahil Pebrero 2024 pa nila inaprubahan ang panukalang dagdag na sahod, habang matagal itong inupuan ng Kamara.
