CAUAYAN CITY – Nasugatan ang dalawang menor de edad matapos na mabangga ng pick up ang kinalululanan nilang motorsiklo sa Sta. Rosa, Bayombong, Nueva Vizcaya.
Ang mga biktima ay ang sakay ng Honda CBR motorcycle na minaneho ni Kirlson Cyrus Cortado, 16-anyos at ang back rider nito ay si Rain Kim Gamilo, 14-anyos, parehong estudyante at mga residente ng Vista Alegre, Bayombong, Nueva Vizcaya.
Hindi naman nakilala ang tsuper ng Toyota Hi lux pick-up dahil agad na umalis matapos ang insidente.
Sa pagsisiyasat ng pulisya ay binabagtas ng motorsiklo ang timog na direksyon patungo sa Bayombong town proper habang ang pick-up ay patungo sa kasalungat na direksyon.
Habang papaliko pakaliwa ang pick-up patungo sa isang gas station ay aksidente nitong nabangga ang motorsiklo na naging dahilan ng pagkakatamo ng sugat ng dalawang biktima.
Sila ay dinala sa Region II Trauma and Medical Center o R2TMC ng mga rumespondeng rescue team.
