CAUAYAN CITY – Nasawi ang isang ginang habang nasugatan ang kanyang mister matapos banggain ng elf wing van ang isang trailer truck na nasa gilid ng daan sa barangay Rizal, Santiago City.
Sa nakuhang impormasyon ng Bombo Radyo Cauayan, dakong 4:40 ng madaling araw nang salpukin ng elf wing van ang trailer truck na nakaparada sa tapat ng isang simbahan sa naturang barangay.
Nagtamo ng malalang sugat sa katawan ang nasawi na si Theresa Montana, 45 anyos habang nasugatan naman ang mister na si Alejandro Montana, 44 anyos, kapwa residente ng San Jose Del Monte, Bulacan.
Napag-alaman na galing sa Ballesteros, Cagayan ang trailer truck at papunta sana sa Nueva Ecija upang maghatid ng mga palay nang magkaproblema umano ang gulong nito kaya’t itinabi ito ng driver sa lugar kung saan nangyari ang aksidente.
Ang elf van naman ay galing Cagayan at nagdeliver ng mga online order at pauwi na sana sa lalawigan ng Bulacan nang makaidlip umano ang tsuper habang nagmamaneho na naging dahilan kaya’t nabangga nito ang nakaparadang trailer truck.
Sa naging panayam ng Bombo Radyo Cauayan, inihayag ni Alejandro Montana na tatlong oras lamang ang kanyang naging pahinga matapos ang pagmamaneho mula Maynila hanggang Cagayan at pabalik na sila Metro Manila nang mangyari ang aksidente.
Nakaidlip umano siya bago mangyari ang aksidente ngunit sinabi niyang may pagkukulang din ang driver ng trailer trcuck dahil masyado umanong malapit ang early warning device sa nakaparadang sasakyan.
Dapat sana ay sa malayo ang inilagay na warning device upang nagkaroon sana siya ng panahon upang iiwas ang Elf Van sa trailer truck.
Sinabi naman ng helper ng trailer truck na si Carlito Baligod na maliwanag ang lugar na kanilang pinaradahan at tama lang ang distansiya ng kanilang early warning device kaya’t imposible na hindi napansin ng driver ng elf van ang kanilang sasakyan.
Pumarada lang umano sila sa gilid ng daan dahil nagkaroon ng problema ang kanilang gulong kaya’t pumagilid sila upang isaayos ito.
Patuloy na nagpapagaling sa Southern Isabela Medical Center si Montana matapos magtamo ng sugat ulo habang ang bangkay ng kanyang misis na si Theresa ay dinala sa isang punerarya.
