CAUAYAN CITY – Naaresto ang isang Grade 12 student sa isinagawang drug buy bust operation ng mga awtoridad sa San Fermin, Cauayan City.
Ang pinaghihinalaan ay 21-anyos, Grade 12 student, at residente ng District 3, Cauayan City.
Nakuha sa pag-iingat ng suspek ang tatlong maliliit na pakete na naglalaman ng hinihinalang shabu, tuyong dahon ng marijuana na binalot ng bondpaper, at isang P1,000 na nagsilbing buy-bust money.
Aminado naman ang pinaghihinalaan na gumagamit siya ng marijuana simula pa noong Nobyembre 2023 subalit itinanggi nito na siya ay nagbebenta.
Aniya, ang marijuana na kanyang dala ay binili niya sa kanyang kaibigan sa halagang P1,000.
Labis naman ang panghihinayang ng suspek dahil nakatakda sana siyang magtapos ng Senior High School ngayong taon.
Sa ngayon ay nasa pangangalaga na ng Cauayan City Police Station ang pinaghihinalaan para sa dokumentasyon at kaukulang disposisyon.
