Hindi bababa sa 30 katao ang nasawi noong Sabado, April 11 sa isang stampede sa hilagang bahagi ng Haiti, at inaasahan pang maaaring tumaas ang bilang ng mga biktima, ayon sa mga awtoridad.
Sinabi ng hepe ng Civil Protection sa Nord Department na naganap ang insidente sa Laferrière Citadel, isang makasaysayang kuta na itinayo noong unang bahagi ng ika-19 na siglo matapos makamit ng Haiti ang kalayaan mula sa France.
Isa ito sa pinakakilalang tourist attraction sa bansa, at noong araw ng insidente ay dinagsa ito ng mga estudyante at bisita na nakikibahagi sa taunang pagdiriwang ng UNESCO World Heritage site.
Ayon sa mga opisyal, naganap ang stampede sa may pasukan ng lugar at lalong lumala ang sitwasyon dahil sa pag-ulan.
Kinumpirma rin ng Prime Minister ng Haiti na si Alix Didier Fils-Aimé na maraming kabataan ang kabilang sa mga dumalo sa selebrasyon, at nagpahayag siya ng pakikiramay sa mga pamilya ng mga biktima at pakikiisa sa kanilang pagdadalamhati.
Wala pang malinaw na pagkakakilanlan sa mga nasawi at patuloy pa ang imbestigasyon sa insidente.
