Naaresto na ang huli sa tatlong suspek na sangkot sa pamamaril na ikinasawi ng isang konsehal mula Rizal, Cagayan noong 2018, ayon sa Criminal Investigation and Detection Group (CIDG).
Sa isang pahayag, sinabi ng CIDG na inaresto ng CIDG–Kalinga Provincial Field Unit, katuwang ang mga lokal na yunit ng pulisya, ang suspek sa Barangay San Pedro, Rizal, Kalinga, noong Martes ng hapon.
Itinago ang suspek sa alyas na “Jose,” 57 taong gulang, residente ng nasabing barangay. Siya ay inaresto sa bisa ng dalawang warrant of arrest na inilabas ng korte sa Tuguegarao City noong 2022 at 2025, kapwa para sa kasong murder.
Ayon sa CIDG, si “Jose” at apat pang kasabwat ay umano’y bumaril at pumatay sa noo’y Konsehal ng Rizal, Cagayan na si Alfredo T. Alvarez sa San Gabriel, Tuguegarao City noong Hulyo 29, 2018, na sinasabing kapalit ng salaping gantimpala.
Nakatala si “Jose” bilang ika-apat na most wanted person sa rehiyon ng Cagayan Valley at sinasabing miyembro ng kriminal na grupong “Labang,” na nasa watchlist ng Directorate for Intelligence (DI) ng Philippine National Police.
Ayon sa CIDG, ang DI-listed na “Labang” Criminal Group ay umano’y sangkot sa gun-for-hire, robbery/hold-up, akyat-bahay, pangingikil, carnapping, at pagnanakaw ng mga hayop sa Ikatlong Distrito ng Cagayan Valley at mga karatig-probinsiya ng Kalinga at Isabela.
