Pinayagan ng International Criminal Court (ICC) Pre-Trial Chamber I ang kahilingan ni dating Pangulong Rodrigo Duterte na hindi dumalo sa pagdinig para sa kaniyang confirmation of charges kaugnay sa kinahaharap nitong Crimes against Humanity na nakatakda sa Pebrero 23-27.
Sa dokumentong may petsang Pebrero 20, sinabi ng Chamber na idaraos pa rin ang confirmation of charges hearing kahit wala si Duterte.
Inatasan din ng hukuman ang kampo ng dating Pangulo, ICC Prosecutors, at ang mga kinatawan ng mga biktima na tukuyin kung alin sa kanilang mga isinumiteng dokumento ang maaaring isapubliko o kailangang i-redact.
Nitong mga nakalipas na araw ay humiling ang si Duterte na payagan itong hindi dumalo sa pagdinig dahil hindi nito kinikilala ang hurisdiksyon ng ICC sa kanyang kaso.
Ayon kay ICC spokesperson Oriane Maillet, ang hindi pagdalo ni Duterte ay batay sa kanyang waiver at hindi dahil sa anumang isyung pangkalusugan. Binigyang-diin din niya na nauna nang napagpasyahan ng Pre-Trial Chamber I na may kakayahan si Duterte na makilahok sa mga pre-trial proceedings.
Ipinaliwanag ni Maillet na sa ilalim ng Article 61, Paragraph 2(a) ng Rome Statute at Rule 124 ng Rules of Procedure and Evidence, maaaring isagawa ng Pre-Trial Chamber ang pagdinig kahit wala ang akusado kung boluntaryo nitong isinuko ang karapatang dumalo.
Gayunman, nilinaw ng ICC na sakaling makumpirma ang mga kaso, hindi pinahihintulutan ng hukuman ang paglilitis kung wala ang akusado.
Samantala, inilabas ng ICC ang Document Containing the Charges (DCC) na inihain ng prosekusyon, kung saan nakasaad ang mga umano’y kasabwat ni Duterte sa kampanya kontra droga at ang mga kasong babasahin sa pagdinig sa susunod na linggo.
Kabilang sa mga pinangalanan sina Senador Ronald dela Rosa, Senador Bong Go, abogadong si Vitaliano Aguirre II, at mga dating opisyal na sina Vicente Danao, Camilo Cascolan, at Oscar Albayalde.
Batay sa tala ng pamahalaan, tinatayang nasa 6,200 ang napatay na hinihinalang sangkot sa droga sa war on drugs campaign administrasyong Duterte. Gayunman, ayon sa mga human rights organizations, maaaring umabot sa 30,000 ang bilang dahil sa mga hindi naitalang kaugnay na pagpatay.
