CAUAYAN CITY – Inihayag ng Department of Tourism (DOT) region 2 na zero ang tourist arrival sa rehiyon simula noong buwan ng Marso 2020 dahil sa epekto ng Coronavirus Disease (COVID-19).
Sa naging panayam ng Bombo Radyo Cauayan kay Regional Director Virgilio Maguigad ng DOT region 2, sinabi niya na simula nang ipatupad ang lockdown ay natigil din ang turismo sa rehiyon.
Wala silang nairecord na tourist arrival sa panahon ng COVID-19 pandemic dahil lahat ng mga tourist destination sa rehiyon ay nagsara .
Sinabi niya na noong taong 2018 ay umabot sa 8.4 billion ang naiambag ng DOT region 2 sa ekonomiya ng bansa na hindi nalalayo sa naiambag nito noong 2019.
Ayon pa kay Regional Director Maguigad, napakalaki ang nawala sa industriya ng turismo ngayong taon ngunit umaasa silang makakabawi ang tourist arrival sa rehiyon sa mga susunod na buwan kapag muling nagbukas ang turismo sa bansa.
Sinabi niya na mahirap magsimula sa tinatawag na new normal subalit sisikapin nilang mapaangat ang domestic tourism.
Gayunman, kailangan ang pag-iingat kapag bumalik na ang lokal na turismo sa bansa at mahigpit pa ring ipatutupad ang health protocol dahil hindi pa ganap na nasusugpo ang COVID-19.
Hinihintay na nila ang kapasyahan ng Inter-agency Task Force (IATF) kung magiging Modified General Community Quarantine (MGCQ) na sa July 1, 2020 ang region 2 at kung kailan mapasigla ang industriya ng turismo sa bansa.
