Hinimok ng ISELCO 1–Santiago Branch ang mga konsyumer na maging responsable sa pagbabayad ng kanilang electric bill upang maiwasan ang disconnection at karagdagang bayarin.
Sa panayam ng Bombo Radyo Cauayan kay Ginang Noemi Valdez, Branch Office Supervisor ng ISELCO 1–Santiago Branch Office, binigyang-diin nito ang kahalagahan ng pagbabayad ng kuryente sa tamang oras, lalo na ngayong nararanasan ang mainit na panahon.
Ayon kay Valdez, dapat unahin ng mga konsyumer ang pagbabayad ng kanilang electric bill dahil mahalaga ang tuloy-tuloy na suplay ng kuryente sa pang-araw-araw na pamumuhay.
Ipinaliwanag din niya na ang hindi pagbabayad sa takdang oras ay maaaring magresulta sa pagkaputol ng serbisyo, na magdudulot ng abala sa mga residente.
Bukod dito, sinabi niyang may karagdagang bayad na ₱80 para sa reconnection ng kuryente sa mga residential consumers, na maaari sanang maiwasan kung maagap ang pagbabayad.
Dahil dito, muling nanawagan ang ISELCO 1 sa publiko na maging disiplinado sa pagbabayad upang makaiwas sa abala at dagdag gastusin.
