CAUAYAN CITY – Labis na nagsisisi ang 2 naarestong estudyante sa isinagawang drug buy-bust operation ng pinagsanib na puwersa ng Philippine Drug Enforcement Agency (PDEA) Region 2 at Cauayan City Police Station sa San Fermin, Cauayan City.
Ang 2 estudyante na naaresto sa kanilang pinagtatambayan na kubo malapit sa kanilang eskuwelahan ay itinago sa mga pangalang Roy at Popoy, kapwa 19 anyos.
Si Popoy na newly identified drug personality ay graduating student sa kursong Bachelor of Science in Business Administration (BSBA) sa isang private school sa Cauayan City.
Ang kasama niyang si Roy ay 2nd year college sa kursong Bachelor of Science in Education sa parehong paaralan.
Una rito ay nakatanggap ng impormasyon ang mga otoridad na ang mga suspek ay nagtutulak ng ipinagbabawal na gamot kaya’t isinagawa ang drug buy bust operation.
Nakumpiska sa pag-iingat ng dalawa ang 3 piraso ng marijuana hashish, isang cellphone at 600 pesos na drug buy-bust money.
Sa panayam ng Bombo Radyo Cauayan, inamin ni Popoy na nagbebenta siya ng droga ngunit maliit na halaga lamang na kinukuha niya sa isang ring estudyante.
Maluha-luha siyang humingi ng tawad sa kanyang nanay dahil posibleng hindi na siya makapagtapos bunsod ng kanyang pagkadakip.
Labis ding nagsisisi si Roy at humingi siya ng tawad sa kanyang ama na nagalit at labis na naghihinanakit sa pagkakasangkot sa droga ng anak dahil ginawa naman niya ang lahat para maitaguyod ang kanyang pag-aaral.
Sasampahan ngayong araw sa piskalya ang 2 estudyante ng kasong paglabag sa Republic Act 9165 (Comrehensive Dangerous Drugs Act of 2002).
