CAUAYAN CITY – Nasawi ang isang lalaki matapos na bumangga sa nakaparadang trailer truck ang minamaneho nitong motorsiklo sa Sinamar Norte, San Mateo, Isabela.
Ang biktima ay si Faustino Juan, 57-anyos, residente ng Bangar, Alfonso Lista, Ifugao habang ang tsuper ng trailer truck ay si Rodel Conrado, 55-anyos at residente ng Abulug, Cagayan.
Batay sa pagsisiyasat ng pulisya, habang nasa byahe ay pansamantalang pumarada ang trailer truck sa gilid ng kalsadang nasasakupan ng Brgy. Sinamar Norte dahil sa tawag ng kalikasan o kailangang umihi ng tsuper.
Nakabukas naman ang hazard lights ng truck nang mabangga ng motorsiklo na minamaneho ng biktima ang likurang bahagi nito.
Agad namang nadala ng mga rumespondeng rescuer sa pagamutan ang biktima ngunit idineklarang dead on arrival.
Dinala naman sa himpilan ng pulisya ang tsuper at minamaneho nitong truck.
