Nasawi ang isang lolo matapos matumba ang sinasakyan nitong mountain bike sa National Highway na bahagi ng Brgy. Magsaysay Hill, sa bayan ng Bambang.
Ang biktima ay si Rudy Cornel, pitumpu’t isang taong gulang, may-asawa, magsasaka at residente ng Almaguer North, Bambang, Nueva Vizcaya.
Sa naging panayam ng Bombo Radyo Cauayan kay PCapt. Manny Paul Pawid Public Information Officer ng Nueva Vizcaya Police Provincial Office, sinabi niyang nagbibisikleta ang biktima patungong Bambang Town Proper at nang makarating sa pababang bahagi ng kalsada ay posible umanong nawalan siya ng balanse at natumba.
Pagkatumba ay tumama ang kanyang ulo sa kalsada.
Sinubukan pa siyang itakbo sa pagamutan ngunit binawian din ng buhay pagkatapos ng ilang oras dahil sa matinding head injury.
Ang labi ng biktima ay nakaburol na sa kanilang tahanan.
