Dalawang magkapatid na operator ng heavy equipment ang nasugatan matapos makuryente sa isang aksidente habang nagbababa ng semento sa Barangay Nappaccu Grande, Reina Mercedes, pasado alas-2:00 ng hapon nitong ikalawa ng Enero
Knilalang sina Jerald Pablo, 35 taong gulang, residente ng Guayabal, Cauayan City, at Garry Pablo, 37 taong gulang, residente ng Laoag City, Ilocos Norte.
Pareho silang driver at operator ng isang Isuzu Elf truck na may boom crane.
Sa panayam ng Bombo Radyo Cauayan Kay PCPT. Jeremias Veniegas, Deputy Chief of Police ng Reina Mercedes, inoo-operate umano ni Jerald ang boom ng truck upang ilipat ang kargang semento nang aksidenteng masagi nito ang isang live na kable ng kuryente.
Dahil dito, parehong nakuryente ang magkapatid, kabilang si Garry na nasa tabi ng truck sa oras ng insidente.
Nagkaroon ng mga pinsala at pagkalapnos (burn injuries) sa kanilang katawan ang dalawang biktima.
Agad silang isinugod sa isang pribadong ospital sa Cauayan City sa tulong ng MDRRMO, Rescue Team, Bureau of Fire Protection (BFP), at PNP Reina Mercedes.
Ayon sa pinakahuling update, nasa maayos at stable na kondisyon ang magkapatid at isasailalim sa minor medical procedures kaugnay sa kanilang mga pinsala.
Pansamantalang itinigil ang operasyon at inilipat na lamang ang kargang semento sa ibang truck sa tulong ng mga awtoridad upang maiwasan ang karagdagang aksidente.
