CAUAYAN CITY – Nasawi ang isang magsasaka matapos siyang pagtatagain ng kapwa nito magsasaka sa Nilumisu, Echague, Isabela.
Kinilala ang biktima na si Ronie Ganab, 50-anyos, magsasaka, may asawa at residente ng San Vicente, Jones, Isabela habang ang suspek ay si Fernando Garcia, 59-anyos, may asawa, magsasaka at residente ng San Carlos, Echague, Isabela.
Batay sa pagsisiyasat ng pulisya, nagkakape ang biktima sa labas ng isang kamalig kasama ang kaibigang si Jhonny Mangantulao nang lumabas ang suspek at tinaga ang biktima gamit ang tabas na tinamaan sa kanyang panga at leeg na naging dahilan ng agaran nitong kamatayan.
Matapos ang pangyayari ay agad na humingi ng tulong si Mangantulao habang ang suspek ay nagtungo sa Barangay San Carlos at boluntaryong sumuko kay Barangay Captain Victoria Saclayan.
Ipinasakamay naman ang suspek sa Echague Police Station para sa kaukulang disposisyon at inihahanda na ang kasong murder laban sa kanya.
