Nahuli ng Philippine National Police (PNP) Nueva Vizcaya ang dalawang truck na naglalaman ng kahoy na nagkakahalaga ng mahigit P1 milyon sa checkpoints sa Aritao at Diadi nitong Miyerkules, March 21.
Ang unang truck, galing Ilagan City patungong Quezon City, ay nagdala ng 421 piraso ng narra at common hardwood na umabot sa 1,907 board feet at nagkakahalaga ng P901,530. Naharang ang sasakyan sa Calitlitan, Aritao bandang ala-una ng madaling araw matapos mapansin ang diperensya sa dokumento ng karga.
Ayon sa PNP Aritao, kinakailangang i-verify ang mga papeles para matiyak na legal ang transportasyon. Matapos ang pagsusuri ng Department of Environment and Natural Resources (DENR), pinayagan ang trak na ipagpatuloy ang biyahe.
Samantala, ang ikalawang truck, galing Bauko, Mountain Province, ay naharang sa Namamparan, Diadi bandang alas-siyete ng umaga.
Ayon sa Diadi PNP at 1st PMFC, sinabi ng driver na gulay ang karga, ngunit naamoy ang pine trees mula sa likuran ng sasakyan. Sa inspeksiyon, nadiskubre ang 3,537 board feet ng pine wood na nagkakahalaga ng P159,000 at walang kasamang dokumento. Dahil dito, naaresto ang driver at pahinante.
Ayon sa PNP, layunin ng operasyon ang masusing pag-check ng mga kahoy upang masiguro na may tamang dokumentasyon, maiwasan ang ilegal na transportasyon ng forest products, at maprotektahan ang likas na yaman ng bansa.
Ipinapaalala rin nila sa publiko na ang pagbiyahe o bentahan ng kahoy nang walang legal na papeles ay labag sa batas at maaaring magdulot ng parusa.
