Nagkaroon ng kalituhan sa planong rematch nina Floyd Mayweather Jr. at Manny Pacquiao matapos ihayag ni Mayweather na maaaring hindi ito matuloy ayon sa orihinal na plano.
Nakatakda sanang magharap muli ang dalawang boxing legend sa Setyembre 19 sa The Sphere sa Las Vegas, bilang rematch ng kanilang blockbuster fight noong 2015. Gayunman, sinabi ni Mayweather sa isang meet and greet event na hindi pa tiyak ang venue at posibleng hindi rin doon ganapin ang laban.
Dagdag pa niya, hindi ito magiging opisyal na professional fight kundi isang exhibition match lamang.
Sumasalungat ito sa naunang anunsyo ng Netflix noong Pebrero, gayundin sa inilabas na pahayag ng kampo ni Mayweather na babalik siya sa boxing at pumirma ng multi-fight deal sa CSI Sports/Fight Sports.
Nauna nang sinabi ng kampo ni Pacquiao na papayag lamang ang Filipino boxing icon sa isang sanctioned professional fight laban kay Mayweather.
Kamakailan lamang ay bumalik sa ring si Pacquiao matapos ang kanyang retirement, kung saan nakipagtabla siya kay Mario Barrios sa isang majority draw.
Samantala, sinabi rin ni Mayweather na plano pa rin niyang sumabak sa exhibition fight laban kay Mike Tyson, bagama’t wala pa itong petsa at venue. May nakatakda rin umano siyang exhibition laban sa Greek kickboxer na si Mike Zambidis sa Athens, Greece, ngunit wala pa ring kumpletong detalye.
Sa kabila ng mga naunang anunsyo, nananatiling hindi tiyak ang pagbabalik ni Mayweather sa boxing, kabilang na ang inaabangang rematch nila ni Pacquiao.
