Matagumpay na naipatupad ng kapulisan ang batas matapos arestuhin si alyas Ben, isang Most Wanted Person (MWP) kaugnay ng iligal na droga, dakong 12:08 ng tanghali nitong Pebrero 7, 2026 sa Brgy. Baculud, City of Ilagan, Isabela.
Kinilala ang suspek bilang 27-anyos na binata, drayber, at residente ng Brgy. San Isidro, City of Ilagan, na nahaharap sa kasong paglabag sa Section 5 at Section 11, Article II ng Republic Act 9165 o Comprehensive Dangerous Drugs Act of 2002—mga kasong may mabigat na parusa at malinaw na banta sa kaligtasan ng komunidad.
Ang operasyon ay isinagawa ng pinagsanib na puwersa ng Ilagan Component City Police Station (lead unit), 201st Maneuver Company ng RMFB2, at RIU 2–PIT Isabela East, sa malapit na koordinasyon sa PDEA Regional Office 2.
Ang pag-aresto ay alinsunod sa Bench Warrant of Arrest na inisyu ng Regional Trial Court, Second Judicial Region, Branch 17, City of Ilagan noong Disyembre 16, 2025. Walang inirekomendang piyansa para sa paglabag sa Section 5, habang P200,000 ang inirekomendang piyansa para sa paglabag sa Section 11 ng RA 9165.
Kaagad namang ipinaalam sa suspek ang kanyang mga karapatang konstitusyonal alinsunod sa Miranda Doctrine. Matapos nito, isinagawa ng Ilagan CCPS ang kinakailangang dokumentasyon bago pormal na i-turn over ang akusado sa korte bilang pagsunod sa itinakdang proseso ng batas.
Ayon sa kapulisan, ang operasyon ay nakaangkla sa focused agenda ng Chief, Philippine National Police (CPNP) na palakasin ang kampanya kontra iligal na droga, higpitan ang pagpapatupad ng batas laban sa mga wanted na indibidwal, at itaguyod ang isang ligtas, maayos, at drug-free na komunidad sa pamamagitan ng maayos, intelihenteng, at makataong police operations.
