Nakapag-isyu ng kabuuang 275 bagong senior citizen identification card ang Office of the Senior Citizens Affairs Santiago City sa loob lamang ng Enero at unang bahagi ng Pebrero ngayong taon.
Sa panayam kay Ginoong Antonio Carrion, Officer-in-Charge ng OSCA, sinabi nitong mandato ng kanilang tanggapan ang pagproseso at pag-iisyu ng senior citizen ID sa Santiago City.
Ayon Kay Carrion, umabot sa 184 ang bagong rehistradong senior citizen noong Enero, habang 91 naman ang naitala mula Pebrero 1 hanggang sa kasalukuyan, kaya’t umabot sa 275 ang kabuuang bilang ng mga bagong ID na naipamahagi sa nasabing dalawang buwan.
Bukod sa mga bagong aplikante, nagproseso rin ang tanggapan ng mga second issue o pagpapalit ng ID para sa mga nawala, na may kaukulang affidavit of loss. Kabilang din dito ang pagpapalit ng mga lumang PVC-type IDs. Noong Enero, nakapag-isyu ang opisina ng 205 replacement IDs, habang 120 naman ngayong Pebrero.
Nilinaw naman ng opisyal na walang expiration date ang mga senior citizen ID na iniisyu ng kanilang tanggapan.
Patuloy namang hinihikayat ng OSCA ang mga kwalipikadong residente na magtungo sa kanilang opisina upang makapagparehistro at makakuha ng kaukulang identification card na magbibigay-daan sa pag-avail ng mga benepisyo para sa mga nakatatanda.
