Tinututukan ngayon ng Department of Agriculture (DA) Region 2 ang pag-atake ng “ulmog” o Brown Planthopper sa mga palayan dahil sa mainit na panahon.
Ayon kay Ginang Irene Estrella, Science Research Specialist II ng Regional Crop Protection Center (RCPC) ng DA Region 2, ang ulmóg ay karaniwang umaatake sa palayan kapag malapit nang maghinog ang palay, lalo na sa panahon ng paglalabas ng uhay hanggang sa milking stage, o kung kailan may laman na ang butil ng palay.
Sa panahong ito, sinisipsip ng ulmog o Brown Planthopper (BPH) ang katas ng mga butil, na nagiging sanhi ng pagkakaroon ng bugok o walang lamang palay at pagbaba ng ani. Mas aktibo ang ulmóg sa gabi at madaling araw, habang kadalasan silang nagtatago sa mga damuhan at halaman sa paligid ng palayan sa umaga at hapon. Madalas din silang dumami kapag maraming damo sa paligid ng sakahan at kapag sabay-sabay na namumulaklak ang mga palayan sa isang lugar.
Mas aktibo ang mga Brown Planthopper sa mainit at tuyong panahon, at madalas silang magtipon sa ilalim ng mga dahon. Kapag mataas ang populasyon, mabilis nilang naaapektuhan ang ani at kalidad ng palay. Maaari rin silang magdala ng rice ragged stunt virus at grassy stunt virus, na lalo pang nagpapababa ng ani.
Huling namonitor ang presensya ng mga peste sa bahagi ng Santiago City, Ramon, San Isidro, at Cabatuan. Nasa maturity stage na ang mga palay sa mga lugar na ito, kaya hindi na inirekomenda ng RCPC ang pag-spray ng insecticide dahil malapit na rin anihin ang mga palay.
Sa ngayon, ang binabantayan ng DA at RCPC ay ang mga palayang nasa milking stage, dahil ang mga ito ang pinaka-bulnerable sa pag-atake ng ulmóg at Brown Planthopper.
Hinikayat naman ng tanggapan ang mga magsasaka na suriin ang mga palayan upang makita ang mga senyales ng pagkakaroon ng mga naturang peste upang maagang mapuksa ang mga ito at hindi makaapekto sa ani.
