Magpapadala ang Pilipinas ng contingent team upang tumulong sa isinasagawang rescue operation sa Myanmar, kasunod ng pagtama ng magnitude 7.7 na lindol noong Biyernes, Marso 28.
Ayon sa Office of Civil Defense (OCD), binubuo ito ng 114 personnels, kung saan 10 dito ay mula sa 525th Combat Engineer Batallion ng Philippine Army.
Dala rin nila ang iba’t ibang equipment gaya ng hydraulic cutter, snake eye camera, listening device at iba pa para sa naturang operasyon.
National Disaster Risk Reduction and Management Council Executive Director Usec. Ariel Nepomuceno, handa na ang sumusunod na grupo na magsagawa ng humanitarian at rescue operations sa apektadong lugar.
Kabilang dito ang tatlong katao mula sa Office of Civil Defense para sa Communications and Logistics, 10 sundalo mula sa 525th Engineering Combat Battalion ng Philippine Army para sa Urban Search and Rescue Light Teams, 11 sundalo mula sa 505th Search and Rescue Group ng Philippine Air Force, 10 kawani ng Bureau of Fire Protection para sa Special Rescue Unit, 10 tauhan ng Metropolitan Manila Development Authority, 14 na Private Sector Volunteers at 32 tauhan ng Department of Health para sa Philippine Emergency Medical Assistance Team.
Hinihiling naman ng Pilipinas ang suporta ng National Disaster Management Office ng Myanmar upang mapadali ang koordinasyon ng PIAHC kung saan kasalukuyang nakipagtutulungan ang Defense and Armed Forces Attaché at ang Philippine Embassy sa Myanmar upang masigurong maayos at mabilis ang humanitarian mission.
