Nanawagan ang Pilipinas na agad na muling buksan ang Strait of Hormuz sa gitna ng epekto ng digmaan sa Middle East sa pandaigdigang suplay ng enerhiya at patuloy na pagtaas ng presyo ng langis.
Sa panayam sa Paris, iginiit ni Defense Secretary Gilberto Teodoro Jr. ang kahalagahan ng agarang pagbubukas at pagpapanatiling ligtas ng nasabing rutang pandagat, hindi lamang para sa mga marino kundi pati na rin sa mga Pilipinong konsyumer na apektado ng tumataas na presyo ng kuryente, gasolina, at iba pang enerhiya.
Halos isinara ng Iran ang Strait of Hormuz matapos sumiklab ang digmaan noong Pebrero 28 kasunod ng mga pag-atake ng Estados Unidos at Israel, na nagdulot ng pagtaas ng presyo ng langis at gas sa pandaigdigang merkado.
Dahil dito, nagdeklara si Pangulong Ferdinand Marcos Jr. ng state of national energy emergency upang tugunan ang banta sa suplay ng fuel at katatagan ng enerhiya sa bansa.
Ayon kay Teodoro, mahalagang isaalang-alang ang mga rekisito ng mga insurer at shipowner sa muling pagbubukas ng ruta, dahil hindi makakabiyahe ang mga barko kung walang sapat na insurance coverage.
Samantala, nagpahayag ang ilang bansa, kabilang ang France at United Kingdom, ng kahandaang tumulong upang matiyak ang ligtas na pagdaan sa Strait of Hormuz, at inaasahang magsasagawa ng military talks ang mga ito upang makabuo ng koalisyon para sa muling pagbubukas ng naturang mahalagang daanan.
