Ngayong ipinagdiriwang ng bansa ang Araw ng mga Bayani, muling binibigyang-pugay ang mga Pilipinong nag-alay ng kanilang buhay para sa bayan. Hindi lamang sina Jose Rizal, Andres Bonifacio, o Emilio Aguinaldo ang dapat tandaan, kundi maging ang mga modernong bayani ng ating panahon. Isa sa kanila ay si Police Officer 3 (PO3) Andres Duque, kabilang sa mga Special Action Force (SAF) 44, at residente ng Aurora Isabela na nagbuwis ng buhay sa madugong engkwentro sa Mamasapano, Maguindanao, noong January 25, 2015.
Sumapi siya sa Philippine National Police noong 2007 at nagsilbi bilang SAF commando hanggang sa huling pagkakataon ng kanyang tungkulin.
Sa Mamasapano, isa siya sa mga tumugon sa isang delikadong misyon upang hulihin ang mga high-profile na terorista. Ngunit sa gitna ng matinding bakbakan, kasama ng 43 niyang kasamahan, nag-alay siya ng buhay. Ang kanilang sakripisyo ay nagdulot ng malalim na sugat sa bansa, ngunit nag-iwan din ng matibay na paalala: na ang kapayapaan at seguridad ay may kapalit na dugo at buhay ng mga bayani.
Hanggang ngayon, tuwing National Heroes Day, ang pangalan ni PO3 Andres Duque ay muling binibigyang-buhay, isang simbolo ng katapatan, tapang, at sakripisyo. Sa kanyang kabaong na balot ng bandila ng Pilipinas, nakita ng sambayanan ang mukha ng tunay na kabayanihan.
Sa paggunita ng Araw ng mga Bayani, hindi lamang ang mga pangalan sa ating kasaysayan ang ating inaalala, kundi pati ang mga gaya ni PO3 Duque—mga modernong bayani na hindi nagdalawang-isip na ialay ang kanilang buhay para sa kaligtasan ng bawat Pilipino.
Ang kanyang alaala ay nagpapaalala sa atin na ang kabayanihan ay hindi nasusukat sa tagal ng panahon, kundi sa tapang at pagmamahal sa bayan. At sa puso ng kanyang pamilya at ng sambayanang Pilipino, mananatili siyang buhay, isang tunay na bayani ng ating panahon.
