CAUAYAN CITY – Sugatan ang isang pulis matapos siyang banggain ng sinisita niyang motorsiklo sa checkpoint sa Brgy. San Juan, Tabuk City, Kalinga.
Ang nasugatan ay si Police Executive Master Sergeant Melvin Hortelano, nakadestino sa Tabuk City Police Station at residente ng Brgy. Bulanao, Tabuk City.
Nasugatan din ang tsuper ng motorsiklo na si Sonny Linggayo Javier, 20-anyos, at residente ng Brgy. Laya West, Tabuk City, Kalinga.
Sa nakuhang impormasyon ng Bombo Radyo Cauayan sa Tabuk City Police Station napag-alaman na habang nagsasagawa ng oplan sita ang pulis kasama ang kanyang mga kasamahan ay sinubukan umano niyang parahin ang driver ng motorsiklo subalit sa halip na tumigil ay pinaharurot pa umano ng driver ang kanyang motorsiklo dahilan kaya’t nasalpok niya ang pulis.
Sa lakas ng pagbangga ay tumilapon ang pulis na naging dahilan nang kanyang pagkasugat sa iba’t ibang bahagi ng kanyang katawan habang natumba naman sa di kalayuan ang driver ng motorsiklo.
