Pumanaw na ang tanyag na rock icon at dating bokalista ng Black Sabbath na si Ozzy Osbourne, sa edad na 76.
Kinumpirma ng kanyang pamilya na si Ozzy ay namatay nang payapa, habang kapiling ang kanyang mga mahal sa buhay sa kanilang tahanan sa England.
Si Ozzy, kilala bilang “Prince of Darkness,” ay isa sa mga haligi ng heavy metal music.
Nakilala siya bilang frontman ng Black Sabbath at nagtagumpay rin sa kanyang solo career sa loob ng mahigit limang dekada.
Ang kanyang mga awitin gaya ng “Crazy Train”, “Iron Man”, at “Paranoid” ay naging simbolo ng isang buong henerasyon ng rock music. Bago siya pumanaw, muling nagsama-sama ang orihinal na miyembro ng Black Sabbath sa isang malaking farewell concert noong Hulyo 5, 2025, na pinamagatang “Back to the Beginning”.
Ginanap ito sa Villa Park sa Birmingham, kung saan libu-libong tagahanga ang dumalo, habang milyon-milyon ang nanood sa livestream. Ito na ang huling beses na nakita si Ozzy sa entablado—nakaupo na lamang siya sa isang “rock throne” dahil sa kanyang matagal nang problema sa likod at Parkinson’s disease.
Matagal nang lumalaban si Osbourne sa mga seryosong karamdaman. Noong 2019, nagkaroon siya ng major fall na nagdulot ng permanenteng pinsala sa kanyang spine.
Kalauna’y isinapubliko rin niya na siya ay may Parkinson’s disease. Bagama’t kinailangang umatras sa mga tour, nanatili siyang aktibo sa paggawa ng musika at sa ilang media appearances.
Bago siya pumanaw, may mga tsismis na siya ay “malapit nang mamatay,” ngunit agad itong itinanggi ng anak niyang si Kelly Osbourne, na nagsabing hindi terminal ang kondisyon ng kanyang ama at patuloy pa ring lumalaban ito.
Sa 2026, nakatakdang ipalabas ang isang dokumentaryong pinamagatang “No Escape from Now” na maglalaman ng tapat at masinsinang pagtalakay sa pinagdaanan ni Ozzy sa kanyang kalusugan at buhay sa huling mga taon.
Mayroon ding nakalinyang concert film ng kanyang farewell show, na ihahandog bilang selebrasyon ng kanyang career. Nagpaabot ng pakikiramay ang iba’t ibang artista at personalidad sa music.
Ayon kay Elton John, si Ozzy ay hindi lamang isang rebolusyonaryo sa musika kundi isa ring tunay na kaibigan. Sa opisyal na X (dating Twitter) account ng Black Sabbath, isang simpleng mensahe ang inilathala: “Ozzy Forever.” Isang alamat ang namaalam.
Ngunit ang musika ni Ozzy Osbourne ay mananatiling buhay sa bawat tunog ng gitara at sigaw ng mga tagahanga sa buong mundo.
