Arestado ang isang sales assistant matapos umanong magnakaw ng mga paninda sa loob ng isang kilalang hardware store sa isang mall sa lungsod ng Cauayan, Isabela.
Batay sa ulat, naganap ang insidente sa isang hardware store sa loob ng mall sa Brgy. District 2. Kinilala ang suspek sa alyas na “Marco,” 24-anyos, isang sales assistant at residente ng San Mariano, Isabela.
Ayon sa imbestigasyon, papatapos na sana ang duty ng suspek nang isailalim siya sa routine body check alinsunod sa standard operating procedure ng establisimyento. Dito nadiskubre ng guwardiya, na kinilalang si “Ben,” na may tinatagong mga gamit ang suspek sa loob ng kanyang bag.
Kabilang sa mga narekober ay isang pares ng gunting na nagkakahalaga ng ₱829 at isang vise grip na nagkakahalaga ng ₱914, na kapwa pag-aari ng naturang tindahan.
Agad na pinigil ng guwardiya ang suspek at ipinaalam ito sa store manager na kinilalang si “Lara,” na siya namang humingi ng tulong sa mga awtoridad. Dinala ang suspek kasama ang mga nakumpiskang ebidensya sa himpilan ng pulisya para sa karagdagang imbestigasyon.
Sa ngayon, nahaharap ang suspek sa kasong may kinalaman sa paglabag sa batas ukol sa pagnanakaw habang patuloy na inaalam ng mga awtoridad ang iba pang detalye ng insidente.
