Inendorso ng Kamara de Representantes ang pagdedeklara ni Pangulong Ferdinand Marcos Jr. ng state of national energy emergency at nangakong maghahain ng mga panukalang batas upang makatulong na mabawasan ang epekto ng mataas na presyo ng produktong petrolyo sa mga Pilipino.
Ayon kay Speaker Faustino “Bojie” Dy III, sa ganitong sitwasyon, mahalaga ang pagkakaisa ng pamahalaan upang maprotektahan ang mamamayan at mapanatili ang pag-usad ng bansa.
Sinabi rin ni Dy na tulad ng agarang aksyon ng Pangulo, kikilos din nang mabilis ang Kamara upang maihatid agad ang tulong sa mga nangangailangan.
Dagdag pa niya, kikilos ang Kamara nang may parehong antas ng agarang pagtugon sa pamamagitan ng mga nakatuong hakbang, masusing pagbabantay, at konkretong tulong para sa mamamayan. Aniya, kumilos ang Pangulo nang mabilis dahil totoo at agarang banta ang sitwasyon, at layunin nitong maagapan ang krisis bago pa ito lalong makaapekto sa mga pamilyang Pilipino.
Nitong Martes, nilagdaan ni Pres. Marcos ang Executive Order 110 na nagdedeklara ng state of national energy emergency, kasama ang Unified Package for Livelihoods, Industry, Food, and Transport o UPLIFT na magsisilbing kabuuang balangkas ng pagtugon ng pamahalaan sa epekto ng mataas na presyo ng produktong petrolyo.
Sa ilalim ng deklarasyong ito, sinabi ni Dy na mas mapapabilis ang aksyon ng gobyerno upang matiyak ang tuloy-tuloy na suplay ng mga produkto at mahahalagang serbisyo.
Binigyang-diin din niya na kapag nagkaroon ng pagkaantala sa suplay ng enerhiya, hindi lamang kuryente ang maaapektuhan kundi pati transportasyon, pagkain, at kabuhayan, kaya kinakailangang kumilos nang maagap at may matibay na pagpapasya.
