CAUAYAN CITY – Patay ang isang lalake matapos na manlaban umano sa isinagawang drug buy-bust operation ng mga miyembro ng Cauayan City Police Station sa Cabaruan, Cauayan City.
Ang napatay ay si Michael Talal alyas Dondon, 39 anyos at residente ng Guayabal, Cauayan City.
Bago ang operasyon ay nakatanggap ng impormasyon ang Cauayan City Police Station may kaugnayan sa pagtutulak ng iligal na droga ng suspek.
Sa pangunguna ni PMaj Arturo Cachero at sa koordinasyon nila sa Philippine Drug Enforcement Agency (PDEA) region 2 ay isinagawa nila ang drug buy-bust operation.
Nakabili ng dalawang sachet ng hinihinalang shabu ang pulis na nagpanggap na poseur/buyer mula kay Talal ngunit nang makatunog umano ang suspek na pulis ang kanyang ka-transaksiyon ay binunot ang baril na nasa kanyang baywang at pinaputukan ang pulis.
Gayunman, nakaganti umano ng putok ang pulis na nagbunga ng pagkamatay ni Talal.
Agad na tumugon ang mga kasapi ng Rescue 922 para malapatan sana ng paunang lunas ang suspek subalit wala na siyang buhay.
