Nanawagan si Manila 2nd District Representative at miyembro ng National Unity Party (NUP) na si Rolando Valeriano ng mas mabigat na parusa laban kay Cavite 4th District Representative Kiko Barzaga, dahil umano sa patuloy nitong paglabag sa mga alituntunin ng Kamara.
Sa kanyang privilege speech sa plenary session nitong Martes, binanggit ni Valeriano ang social media post ni Barzaga kung saan inakusahan nito ang mga kongresista ng NUP na tumanggap ng “lagay” mula sa negosyanteng si Enrique Razon bago ang halalan noong 2025, kapalit ng suporta kay dating House Speaker Martin Romualdez. Tinawag ni Valeriano ang akusasyon bilang isang “malaking kasinungalingan.”
Ang naturang post ay naging paksa ng mga kasong cyberlibel na hiwalay na isinampa nina Valeriano, House Deputy Speaker Ronaldo Puno, at Razon laban kay Barzaga. Binanggit din ni Valeriano ang iba pang social media posts ni Barzaga na nag-uugnay sa yumaong kongresista Romeo Acop sa umano’y katiwalian sa flood control projects.
Hiniling ni Valeriano na muling patawan ng suspensyon si Barzaga, na walang sahod at allowance.
Ipinasa ng Kamara ang privilege speech ni Valeriano sa House Committee on Ethics and Privileges upang magsagawa ng pagdinig at masusing pagsusuri sa asal ni Barzaga sa panahon ng kanyang suspensyon, at magbigay ng rekomendasyon sa plenaryo.
Samantala, sa kanyang pahayag, iginiit ni Barzaga na maghahain siya ng ebidensya sa korte kaugnay ng kanyang alegasyon ng suhulan.
Matatandaan na noong Disyembre nakaraang taon, pinatawan ng 60-araw na suspensyon si Barzaga ng Kamara matapos siyang ideklarang “guilty of disorderly behavior” dahil sa umano’y “reckless” at “inflammatory” na mga post sa social media. Binalaan noon ng Kamara na ang mga pag-uulit ng ganitong asal ay haharap sa mas mabigat na kaparusahan.
