Tumaas na ng hanggang ₱1 kada litro ang presyo ng mga produktong petrolyo sa bansa ngayong Martes, kung saan pumasok na sa ikapitong sunod na linggo ng pagtaas ang presyo ng diesel.
Sa isang abiso kahapon, araw ng Lunes, inanunsiyo ng Seaoil na ipinatupad nila ngayong araw ang ₱1 kada litro na dagdag-presyo sa diesel. Tumaas din ng 60 sentimo kada litro ang presyo ng gasolina at kerosene, na siyang ikalimang at ikapitong magkakasunod na linggo ng oil price hike, ayon sa kumpanya.
Ayon kay Jetti Petroleum president Leo Bellas, ang panibagong pagtaas ng presyo ng produktong petrolyo ay dulot ng mga panganib sa suplay at ng nagpapatuloy na tensyong geopolitikal sa pandaigdigang merkado.
Sinabi ni Bellas na ang presyo ng diesel ay sinusuportahan ng mga isyung may kinalaman sa suplay at demand dulot ng lagay ng panahon, gayundin ng patuloy na tensyon sa Middle East na direktang nakaaapekto sa supply dynamics ng langis, sa panahong unti-unti nang lumalayo ang Europa sa mga produktong petrolyo na nagmumula sa Russia.
Samantala, muling tiniyak ng Department of Energy (DOE) na mahigpit nilang binabantayan ang galaw ng lokal na merkado upang matiyak na ang mga ipinatutupad na price adjustment ay makatarungan at naaayon sa umiiral na mga kondisyon.
