Isang suicide bomber ang nagpasabog ng bomba sa gitna ng dasal ng Biyernes sa isang Shi’ite Muslim mosque sa Islamabad, na ikinasawi ng hindi bababa sa 31 katao at ikinasugat ng halos 170 iba pa, ayon sa mga opisyal. Itinuturing itong pinakamalalang pag-atake sa kabisera sa loob ng mahigit isang dekada.
Mga larawan mula sa lugar ang nagpapakita ng mga duguang katawan na nakahandusay sa carpet ng mosque, napapalibutan ng bubog at debris, habang nagkakagulo ang mga mananampalataya. Dose-dosenang sugatan pa ang nakahiga sa hardin ng Khadija Tul Kubra Imambargah, sa labas ng Islamabad, habang humihingi ng tulong.
Ayon sa mga pulis, naharang ang salarin sa gate ng mosque bago nito pinasabog ang bomba. Tumanggi silang magpakilala dahil hindi sila awtorisadong magsalita sa media.
Bagaman bihira ang pambobomba sa mahigpit na binabantayang Islamabad, matagal nang tinatamaan ang Pakistan ng tumitinding militansya, lalo na sa hangganan nito sa Afghanistan.
Sinabi ni Deputy Commissioner Irfan Memon: “Kabuuang 31 katao ang nasawi. Umabot na sa 169 ang bilang ng mga sugatang dinala sa mga ospital.”
Ayon sa conflict monitor na ACLED, ang pag-atake ay may “tatak” ng Islamic State. Ang mga Shi’ite, na minorya sa bansang mayorya ay Sunni Muslim, ay matagal nang nagiging target ng sektaryang karahasan mula sa Islamic State at grupong Sunni Islamist na Tehreek-e-Taliban Pakistan (TTP).
Sinabi ni Parliamentary Affairs Minister Tariq Fazal matapos bisitahin ang mga sugatan na nabigyan na ang mga biktima ng tulong maging ang pamilya ng mga nasawi.
Naka-high alert na rin ang kabisera dahil sa pagbisita ni Uzbekistan President Shavkat Mirziyoyev, kung saan maraming checkpoint at puwersa ng seguridad ang nakapuwesto sa lungsod.
Nagpahayag si Foreign Minister Ishaq Dar sa X na ang pag-atake sa mga lugar ng pagsamba at sibilyan ay isang karumal-dumal na krimen laban sa sangkatauhan at tahasang paglabag sa mga prinsipyo ng Islam. Ang Pakistan ay nagkakaisa laban sa terorismo sa lahat ng anyo nito.
Ang insidente ay kasunod ng linggo ng karahasan sa Balochistan province, kung saan sinalakay ng mga separatistang militante ang mga gusali ng gobyerno, ospital, at pamilihan, na ikinasawi ng 58 sibilyan at opisyal ng seguridad. Ayon sa militar, 216 militante ang napatay sa mga opensiba.
Sa parehong araw, iniulat ng militar na 24 militante na konektado sa TTP ang napatay sa Khyber Pakhtunkhwa province.
Ang huling malaking pag-atake sa Islamabad bago ito ay noong Nobyembre 11, isang suicide bombing na pumatay ng 12 katao at nakasugat ng 27 iba pa, na isinagawa umano ng isang Afghan national. Walang grupong umako ng responsibilidad sa naturang insidente.
