CAUAYAN CITY -natagpuan na ng mga rescue team ang katawan ng 6 anyos na bata matapos na malunod sa Cagayan River na bahagi ng Brgy. Calamagui 1st , Ilagan City kahapon ng hapon.
Ang biktima ay si Kyzer Clyne Baston, 6 anyos, residente ng Purok 7, Bliss Village, City of Ilagan, Isabela
Sa panayam ng Bombo Radyo Cauayan, inihayag ni City Disaster Risk Reduction Management Officer Butch Estabillo na sa kabila na malakas ang under current ng tubig ay nagtulong tulong ang mga kasapi ng Rescue 1124 at DART Rescue 831 maging ng City of Ilagan Police nakuha ang katawan ng nalunod na bata.
Batay sa pagsisiyasat ng mga otoridad, nakita ng witness na si Elpido Magaliona, 31 anyos , may asawa, helper at residente ng Calamagui 1st, City of Ilagan ang kamay ng bata gayundin ang kanyang tsinelas habang nalulunod sa naturang ilog.
Binibisita umano nito ang mga alaga niyang kambing tatlong daang metro ang layo mula sa lugar kung saan nalunod ang bata.
Sinubukan naman niyang sagipin ang bata subalit tuluyan na itong lumubog sa tubig.
Batay din sa nakakita, may kasama ang biktima nang mangyari ang insidente.
Nanawagan ang CRRRMO sa mga magulang na bantayan ang kanilang mga anak at huwag payagang magtungo sa ilog upang maiwasan ang kahalintulad na aksidente.
