CAUAYAN CITY – Walo ang nasugatan, kabilang ang isang buntis matapos bumaliktad kaninang umaga ang isang jeep sa barangay De Vera, Cauayan City.
Sa nakuhang impormasyon ng Bombo Radyo Cauayan mula kay dating Barangay Kagawad Nenita Ramos ng De Vera, sinabi niya na kukuha sana ng grants sa 4P’s ang mga sakay ng jeep mula sa Dicamay, San Mariano, Isabela.
Nang makarating ang jeep sa pakurbang bahagi ng daan sa barangay De Vera ay nadulas umano at natumba sa gilid ng daan dahil sa mga putik sa ibabaw ng sementadong daan.
Sa talaan ng Rescue 922 ay walo sa mga sakay ng jeep ang nagtamo ng mga sugat sa katawan kabilang ang isang buntis na nawalan ng malay at agad dinala sa ospital.
Nilapatan ng Rescue 922 ng paunang lunas ang mga nasugatang sakay ng jeep.
With reports from Bombo Kervin Gammad
Photo credit: SP Member Jong Gapasin
